ROXAS CITY, CAPIZ- Nagalaum si Congressman Nathaniel Oducado sang 1Tahanan Party-list nga i-talakay ni Presidente Ferdinand Marcos Jr. ang importante nga mga isyu sa iya ika-apat nga State of the Nation Address (SONA) nga natalana sa Lunes, Hulyo 28, 2025.
Sa interview sang Bombo Radyo kay Cong. Oducado, ginsiling sini nga pila sa mga ginalauman nga topiko amo ang pungsodnon nga seguridad ka gang nagapadayon nga tensyon sa West Philippine Sea tuga sang paliwat-liwat nga pagpang-harass sang China sa Pilipinas.
Suno sa mamalidha, luyag nya man nga mabatian ang mga konkreto nga estratehiya sang Presidente agud hatagan igtalupangod ang epekto sang inflation, subong man ang mga tikang para sa food security kag bastante nga suplay sang pagkaon agud masiguro nga sarang makabakal sang abot-kaya nga pagkaon ang mga pamilyang Pilipino.
Dugang pa sini, impotante man nga mahatagan sang igtalupangod ang disaster resiliency sa tunga sang asud-asod nga bagyo kag pagbaha nga nagaka-eksperyensyahan sa nagkalain-lain nga bahin sang pungsod.
Nagalaum si Oducado nga magahatag sang kaathagan kag direksyon ang SONA ni Presidente Marcos Jr. sa sitwasyon sa karon sang pungsod.
Interviewed by Bombo Jessa Mae De Los Santos
