ROXAS CITY – Gintaban sang wala makilan-an nga kawatan ang duha ka laptop sa isa ka establisyemento sa Fuentes Drive, Barangay IX, Roxas City.
Sa impormasyon nga nakuha sang Bombo Radyo nagikan sa Roxas City PNP, nga suno kay Luceno Añover, Marketing supervisor ginpahayag sini nga may nagsulod nga isa ka persona sa ila store kag naglantaw sang mga baligya apang makaligad lamang ang pila ka minutos wala na ini niya natalupangdan.
Sa pagtsekyar sa CCTV sa lugar, nakit-an sini nga ang amu nga persona ginbuksan ang cabinet kag natigayon nga mataban ang laptop Acer nga nagabalor P29,880.00 kag model No.A15-5IP-33C3 nga laptop nga nagabalor naman sang P37,040.00.
Mahibaluan nga madasig nga nakapalagyo ang suspek sa lugar sakay sang tricycle kaupod ang duha pa ka wala makilan-an nga mga persona.
Sa karun padayon pagpatigayon sang hot pursuit operation sang mga kapulisan batuk sa mga suspetsado.
