ROXAS CITY – Arestado ang duha ka mga mangingisda, matapos nadakpan nga nagapatigayon sang illegal nga pagpangisda sa kalalawran nga sakop sang Barangay Punta Cogon, Roxas City.
Sa impormasyon nga nakuha sang Bombo Radyo nagikan sa Roxas City Police Station, ginkilala ang mga nagkaladakpan nga sanday alyas Rogelio, 55-anyos, kapitan kag tag-iya sang sakayan kag residente sang Barangay Agojo, Panay, Capiz kag alyas Jayson, 20-anyos, tripulante kag residente sang Barangay Cogon, sining syudad.
Narekober sa mga ini ang isa ka unit sang fishing boat nga nagabalor P70,000.00, makina nga nagabalor sang P15,000.00, fishing gear nga nagabalor sang P20,000. kag kapin 7 kilos nga mga nagkalain-lain nga isda nga nagabalor sang P1,050.00.
Sa karun, yara na ang mga ini sa paghinakop sang Fishery and Agriculture Office subong man ang mga nakumpiskar nga kagamitan para sa nagakaigo nga disposisyon.
