ROXAS CITY – Dead on the spot ang duha ka mga persona matapos nga matapakan sang truck sa national highway sang Brgy. Tinaytayan, Dumarao, Capiz.
Ginkilala ang driver sang motorsiklo nga Suzuki Raider 150 kay Lemar Venus, 24-anyos kag backrider sini nga si Fritz Alenain, 19-anyos, lunsay nga residente sang Barangay Bungsuan, sa amu man nga banwa.
Samtang ang driver sang Fuso Cargo truck ang ginkilala kay Joel Mariano, 58-anyos, residente sang Agboy Norte, Leon, Iloilo.
Sandig sa inisyal nga imbestigasyon sang traffic section sang Dumarao MPS, nagikan ang motorsiklo sa direksyon sang Cuartero kag magapauli sa Bungsuan, apang pag-abot sa lugar, ginpahayag nga nagpang-agaw ini sang linya, kag dumiretso bunggo sa kasugata nga truck.
Bangud sa impact sang pagkabunggo, natapakan ang ila ulo nga gintunaan sang ila dalayon nga kamatayon.
Nahibaluan nga madasig ang pagpadalagan sang motorsiklo kag yara sa impluwensiya sang makahulubog nga ilimnon ang mga sakay sini.
Sa dugang nga impormasyon, nahibaluan nga nagikan sa binaylehan sa kaiping nga barangay ang duha.
Sa karon, nakakustodiya ang driver sang truck sa Dumarao MPS para sa nagakaigo nga disposisyon.
Padayon ang imbestigasyon sang mga kapulisan angut sa insidente.
