ROXAS CITY – Yara sa P172,000 nga kwarta ang nataban sang isa ka unidentified nga suspek matapos nga ginhold-up ang duha ka mga persona sa Sitio Tacay, Brgy. Astorga sa banwa sang Dumarao.
Ginkilala ang mga biktima nga sanday Mary Jean Bista, 25-anyos, isa ka development officer sang Ahon sa hirap, Inc. nga residente sang Sitio Minoro, Brgy. Atiplo, Mambusao kag Julio Handoy, 62 anyos nga residente sang Brgy. Lawaan, banwa sang Dumarao.
Sandig sa Dumarao Municipal Police Station, nga takna 6:30 kagab-i sang Miyerkules, naghalin ang mga biktima sa Brgy. San Antonio sa banwa sang Cuartero matapos nagpangolekta sang payment para sa nasambit nga lending company.
Samtang ginasubay sang duwa ka biktima ang dalanon sakay sa motorsiklo, hinali nalang sila ginpapundo sang isa ka lalaki kasunod sa pagtaya sang armas luthang kag nagdeklarar ini sang hold-up.
Nataban sang suspek ang nasambit nga kantidad nga iga-remit na kuntani ni Vista sa ila nga opisina kag Lenovo tablet nga nagabalor naman sang P7,000.
Ginapahayag nga nakasuksok sang itom nga bayo kag pantalon ang suspek nga nagamaneho sang Kawasaki Bajaj nga motorsiklo kun sa diin ginsubay ang direksyon padulong sa Barangay Sibariwan, banwa sang Dumarao matapos ang insidente. Sa karun, nagapadayon pa ang imbestigasyon sang Dumarao PNP sa nasambit nga hitabo.
