ROXAS CITY – Nagpalab-ot sang ila hibubun-ot ang duha ka tricycle drivers kun sa diin ginareklamo sang mga ini ang panibag-o nga polisiya sang isa ka dako nga mall, sa Barangay Lawaan, sini nga syudad angut sa pinilahay sang mga drivers sang pampasahero nga traysikol.
Sa interview sang Bombo Radyo sa mga drivers nga sanday RJ kag Jeros, nga ginkakibot na lamang nila nga bawal na sila magpila kun wala man lang sang pasahero nga igadul-ong sa mall.
Sa pagpangusisa sang duha, nahibaluan nila nga ang nasambit nga polisiya ang ginmandu mismo sang management.
Partikular nga ginareklamo sang duha si SG Bigcas, bangud suno sa mga ini nga masami mainit ang ulo sang guwardiya sa tion nga magpangsita.
Sa pagpakig-angut sang Bombo Radyo sa OIC sang security personnel sang mall angut sa reklamo sa ila tinawo, ginpahayag sini nga maid-id ang ila pagpili sa ila security guards, kag ginpasiguro nga wala sang malain nga rekord ang ila SG.
Samtang, ginpahayag sang OIC ang rason sa pagbawal sa mga tricycle drivers nga magpila kun wala sang igadul-ong nga pasahero, suno diri, para lamang ini sa seguridad sang tanan, matapos ang asud-asod nga insidente sa syudad kag agud mamonitor ang mga tawo nga nagapadulong sa mall.
Panugyan sang mga drivers sa management sang mall, nga kuntani ibalik na ang anay nga polisiya kun sa diin matawhay ang ila pagpila bangud daku ini nga bulig, sa baylo nga maglibot pa kun sa diin nga mausik sa gasolina.
