ROXAS CITY – Nagparekord sa Roxas City Police Station ang isa ka 21-anyos nga persona matapos nga ginaalegar indi pag i-discharge ang ila pasyente sang isa ka ospital sa San Roque Extension, Barangay 8, Roxas City.
Sandig sa ginpabalhag nga reklamo ni Zendy Alisasis sang Barangay Libas sining siyudad nga nagpamangkot ini sa billing section sang nasambit nga ospital nga kun mahimo pwede na ma-discharge ang iya iloy matapos nga nakarekober na ini sa iya balatian apisar nga wala pa sila nakabayad sang ila nga bill sa amo nga ospital.
Ginpahayag ni Alisasis nga naghinyo man ini sa ospital nga kun mahimo paguwaon na lang anay ang iya iloy apisar nga wala pa sila nakabayad sang bill bangud magapasa man ini sang promissory note kag bayaran man nila ini amat-amat.
Apang, sa baylo nga pahanugotan nga makaguwa sa ospital ang iya iloy, wala sila ginpahanugotan rason nga ginpakamaayo na lamang sini nga iparekord sa pulisya ang insidente.
