ROXAS CITY – Patay ang 22-anyos nga lalaki matapos nga ginaalegar naaksidente sa ginamaneho nga motorsiklo kag nalapakan sang salakyan sa Casalsagan, Pototan, Iloilo.
Ginkilala ang biktima nga si Jesse Adolfo sang Arnaldo Blvrd., Barangay Baybay, Roxas City.
Base sa inisyal nga imbestigasyon sang mga kapulisan nga papuli na kuntani sa Roxas ang biktima sakay sa iya nga Kawasaki nga motorsiklo gikan sa siyudad sang Iloilo sang natabo ang aksidente.
Nahibaluan nga magaliko na kuntani pawala ang ginasundan sang biktima nga toyota sedan nga salakyan nga ginamaneho ni Erik Justin Blancaflor 33-anyos sang Lapaz, Iloilo sang aksidente ini nabungguan ni Adolfo.
Bangud diri, natumba ang biktima sa motorsiklo rason nga aksidente naman ini nga nalapakan sang Hyundai nga salakyan nga ginamaneho ni Ryan Denosta 36-anyos sang Villa Espana, Quezon City.
Ginapahayag nga guba ang helmet kag nag-angkon sang patal nga pilas sa ulo ang biktima.
Gindala pa ang biktima sa ospital apang gindeklarar man ini nga dead on arrival.
Samtang, nakahilway naman ang duha ka mga driver sang salakyan matapos nga nagkasugot naman ang magtimbang nga bahin.
