ROXAS CITY – Nagpabalhag sa Roxas City Police Station ang isa ka babaye matapos ginapahayag ginhold-up sang duwa ka lalaki sa Magallanes Street, Brgy I, Roxas City.
Ginkilala ang nagpabalhag kay alyas Bebe, 23-anyos residente sang McKinley Street, Brgy I, sining syudad.
Sandig sa ginparekord sang biktima, nga takna alas 4 sang kaaganhon sang nagalakat ini kaupod ang iya mga abyan sa Magallanes Street, Brgy I, malapit sa provincial capitol sang hinali may nagpundo nga motorsiklo sa ila atubang sakay ang duwa ka lalaki nga lunsay nakasuksok sang itom nga jacket.
Ginapahayag nga ginkaptan sang isa sa suspek ang kamot sang biktima kun sa diin gintayaan pa ini sang matalom nga butang kag nagdeklarar sang hold-up.
Nataban sang wala makilala nga mga suspek ang cellphone sang biktima nga ginakaptan sini kag madasig nga nagpadalagan sang ila motorsiklo padulong sa may bahin sang lipunan.
Ginpakamaayo nalang sang biktima nga iparekord sa Roxas City PNP ang natabo.
Sa karun, padayon pa nga ginahibalo sang kapulisan ang pagkakilanlan sang mga suspetsado.
