ROXAS CITY – Nagapadayon pa sa karon ang contact-tracing sang Capiz Provincial Health Office sa mga nakahalubilo sang mga nag-positibo sa coronavirus disease (COVID-19) nga mga Returning Overseas Filipinos (ROF’s) kag Locally-Stranded Individuals (LSI’s).
Ini ang ginpahayag ni Capiz PHO Public Information Officer Ayr Altavas sang mainterview sang Bombo Radyo.
Matandaan nga sadtong Hulyo 13, Lunes nga adlaw, narekord sa probinsiya ang dugang nga 10 ka mga kaso sang nasambit nga balatian kun sa diin ang 3 diri ang ROF’s kag 7 naman ang LSI’s.
Sang Hulyo 17, Biyernes nga adlaw, narekord naman ang dugang nga 1 ka kaso sang amo nga balatian nga isa ka LSI.
Bangud diri suno kay Altavas, padayon ang ila nga pagpang-usisa sa nasambit nga mga pasyente agud matumod ang mga indibidwal nga ila nakahalubilo.
Ginpahayag sini nga sa karon nagdangat na sa 26 ang narekord nga naka-close contact sang nasambit nga mga pasyente kag 27 naman ang ginakabig nga ila naka-general contact.
Wala suno diri nagauntat ang health sector sa pagpanalawsaw natuhoy sa mga ginpadulungan sang amo nga mga pasyente bangud indi malipod nga ang iban sa ila ang wala nagasugid sang matuod.
Gintawag naman ni Altavas nga ‘imported’ ang narekord nga dugang nga mga kaso sang COVID-19 sa probinsiya bangud lunsay naghalin sila sa luwas sang probinsiya.
