ROXAS CITY – Nag-abot na sa Capiz Villareal Stadium ang una nga batch sang repatriated Overseas Filipino Workers (OFW’s) subong nga adlaw, Mayo 27.
Mahibaluan nga 26 tanan ka mga OFW’s ang kalakip sa una nga batch nga nag-abot sini nga adlaw.
Sa nasambit nga numero 11 diri ang taga-Roxas City; 2 sa Ivisan; 1 sa Dao; 4 sa Panitan; 1 sa Tapaz; 2 sa Pontevedra; 2 sa Dumalag; 1 sa Mambusao; 1 sa President Roxas; kag 1 sa Jamindan.
Ang nasambit nga mga OFW’s ang ginpangsugat sang mga katapo sang magkatuhay nga mga Municipal Disaster Risk Reduction and Management Office (MDRRMO) sa mga kabanwahanan kag igadul-ong sa designated quarantine facility sang ila tagsa ka mga local government unit (LGU’s).
Kapareho sa iban nga mga repatriates nga una na nakapauli sa probinsiya, pagakuhaan man ang mga ini sang swab specimen agud ipaidalom sa real-time polymerase chain reaction (RT-PCR) test.
Mahibaluan nga ang pagpauli sang nasambit nga mga OFW’s ang kabahin sang repatriation program sang gobyerno-nasyunal matapos nga nagdamo ang stranded OFW’s sa Metro Manila bangud sang lockdown tuga sang coronavirus disease (COVID-19) pandemic.
