ROXAS CITY – Pilason ang tatlo ka mga lalaki matapos naaksidente ang ginasakyan nga motorsiklo sa national highway sang Barangay Salocon, Panitan, Capiz.
Lunsay nag-angkon sang mga pilas sa lawas ang mga biktima nga sanday Bobot Atadero 32-anyos sang Barangay Jolongajog, Pontevedra kag driver sang motorsiklo kaupod ang mga backrider nga sanday Edmundo Besana 23-anyos sang Barangay Carataya, Maayon kag Vincent Recto sang Barangay Parian, Sigma.
Nagaguwa sa imbestigasyon sang mga pulis nga sakay sang motorsiklo ang tatlo ka mga biktima kag ginasubay ang dalan pauli sang wala ginalauman ang kurbadahon nga alagyan.
Bangud diri, nadulaan sang kontrol sa manubela ang driver kag natumba ang motorsiklo.
Gilayon nga gindala sa ospital ang mga biktima, para mabulong ang ila kasamaran.
Nahibaluan nga lunsay nakainum ang tatlo ka mga biktima sang nagluntad ang aksidente.
