ROXAS CITY — Ginbawian naman sang kabuhi ang tatlo ka magpamilya nga kalakip sa mga biktima sang pagpanglabo sang isa ka lalaki nga nag-amok sa Barangay Tanza, Panay, Capiz.
Sa interview sang Bombo Radyo Roxas sa imbestigador sang Panay Municipal Police Station nga si PO2 Bryan Bacay, ginkumpirma sini nga wala na natabangan sa ospital ang mga biktima nga sanday Concepcion Celino, 70-anyos; anak sini nga si Ramilyn Labto, 31-anyos kag apo na si Jera, apat ka tuig bangud sa naangkon nga patal nga mga pilas sa ila kalawasan.
Suno kay Bacay, nagalaba sa guwa sang ila balay si Labto sang hinali nga nag-abot ang suspek nga si Nestor Beldia, 60-anyos kag wala sang kaluoy sini nga ginpanglabo sang binangon ang ginang antes ginsulod ang balay kag ginpanglabo sanday Celino kag Jera.
Wala pa nakuntento ang suspek kag pagguwa sang balay ginlagas kag ginpanglabo man sini ang pila ka mga residente nga nagdinalagan na matapos nga ila nasaksihan ang insidente.
Pilason ang tatlo ka iban pa nga sanday Thelma Arabia, 72-anyos kag mga menor-de-edad nga sanday Prince, 10-anyos kag Honeyfel, 3-anyos nga karon ginabulong pa sa ospital sa syudad.
Natiruhan-patay sang nagresponde nga mga pulis ang suspek nga si Beldia matapos ginaalegar nga magbato ini sang dakpon sang mga otoridad.
Indi pa sa karon matumod sang pulisya ang motibo sang suspek sa pagpanglabo, apang nahibaluan nga may sakit nga prostate cancer kag pila na ka gab-I nga wala nakatulog bangud sa pagpanumdum sa ginasuprer nga balatian.
