ROXAS CITY – Pilason ang tatlo ka mga persona matapos nga magbungguanay ang duha ka mga motorsiklo, sa national highway sang Barangay Lonoy, Roxas City, kagab-i sang alas-6:40, Pebrero 4.
Ginkilala ang driver sang Yamaha Soul kay Kyle Carlo Celoso, 26-anyos, residente sang Barangay Bago, Roxas City.
Samtang, ang driver sang Honda XRM nga motorsiklo amu si Jeffrey Jacinto, 32-anyos, kag ang backrider sini nga si Jonard Biñosa, 34-anyos, nga lunsay mga residente sang Brgy. Lonoy, sa syudad man sang Roxas.
Sandig sa nakuha nga impormasyon sang Bombo Radyo sa traffic section sang Roxas Component City Police Station, nga samtang ginasubay sang driver sang Yamaha ang amu nga dalan nagikan sa banwa sang Sigma papuli sa ila barangay, sang ginpahayag nga nagpang-agaw sang linya sa dalan ang kasugata nga Honda XRM nga motorsiklo nga ginamaneho sang nasambit nga driver.
Bangud sa impact, nag-angkon sang kapilasan sa magkatuhay nga parte sang lawas ang tatlo ka mga persona, kun sa diin, gilayon nga nagresponde ang katapo sang Loctugan Fire substation kag Capiz Emergency Response Team (CERT) agud maghatag sang pauna nga pagbulong.
Ginpadangat naman ang mga ini sa magkatuhay nga ospital sa syudad sang Roxas.
