Yara na sa estable nga kondisyon ang tatlo ka mga sakay sang Elf Truck, matapos ini ang nagtakilid sa Barangay Caridad, Jamindan, Capiz.
Matandaan nga ginkilala ang driver sang truck nga si alyas “Vincent”, 30 anyos, kag mga sakay sini nga sanday alyas “Angelo”, 34-anyos, alyas “Francis”-29-anyos kag lunsay mga residente sang nasambit nga lugar.
Sa interview sang Bombo Radyo sa hepe sang Jamindan Municipal Police Station nga si PLT. Liberato Cagampang Jr., ginpahayag sini samtang ginasubay sang nasambit nga truck nga may karga nga balas ang kurbadahon nga dalan nagikan sa amu nga barangay kag padulong kuntani sa Barangay Esperanza, hinali lamang ini nga nadulaan sang kontrol rason nga aksidente ini nga bumunggo sa konkreto nga pader.
Suno sa hepe nag-angkon sang pilas sa nagkalain-lain nga parte sang lawas ang tatlo ka mga biktima nga gilayon naman nga ginpadangat sa malapit nga ospital para sa nagakaigo nga pagbulong.
Dugang pa ni Cagampang nga yara sa impluwensya sang makahulobog nga ilimnon ang driver kag posible nga madasig ang pagpadalagan.
Samtang, pagasabton naman sang tag iya sang truck ang tanan nga kahalitan kag pagpabulong sa tatlo ka mga persona.
Sa karon yara na sa kustodiya sang Jamindan MPS ang truck para sa nagakaigo nga disposisyon.
