ROXAS CITY— Padayun nga ginabulong sa ospital ang napulo ka mga tawo matapos mahulog sa hanging bridge sa Barangay Pang-pang Norte, Mambusao, Capiz.
Ba-se sa imbestigasyon sang mga kapulisan, magakumpanyar kuntani ang mga biktima sang mag-agi sila sa hanging bridge.
Samtang nagalakat sila, hinali lamang nga nagtakilid ang nasambit nga tulay nga himo lamang sa kawayan, rason nga nahulog ang kapin sa 30 ka mga tawo sa suba kag napulo ang napilasan.
Apang antes nagtakilid ang hanging bridge, nauna na nga nakatabuk ang mga tawo nga nagadala sang lungon.
Suno kay Lorna Leonida, isa sa mga biktima nga antes nagtakilid ang tulay, nakabati sila nga may na-crack kasunod ang pagkahulog sang iban sini nga mga kaupdanan.
Maswerte lamang si Leonida bangud nakakabit ini sa isa ka kabilya kag nagpakabit kabit sila nga anum tobtob nag-abot angmga rescuers.
Madamo man sa iya mga kaupdanan ang nabalian sang kamot, tiil kag nagpalanakit ang ila nga dughan.
Nahibaluan nga iban sa mga biktima ang nakainum pa sang tubig sa suba.
Nahibaluan nga madugay na nga ginagamit sang mga residente ang hanging bridge bangud nagaserbe ini nga nagapanguna nga alagyan agud makatabuk sila sa suba padulong sa banwa.
