CAPIZ- Yara sa kabug-usan 33 ka mga armas-luthang ang boluntaryo nga ginsungka sa mga katapo sang kapulisan sa probinsya sang Capiz sa sulod sang isa ka-tuig sumugod Abril 2024 tubtob Mayo 2025.
Sa interview sang Bombo Radyo kay Police Lieutenant Colonel Lumyaen Lidawan, Force Commander sang 1st Capiz Provincial Mobile Force Company, ginpahayag nga ang kadalag-an ang kabahin sang ginpasangkad nga programa nga Tokhang Kontra Armas-Luthang “TKAL”, agud ngas mapabilin ang kalinong kag katawhay sa palibot.
Dugang pa sini, bangud sa mga ginapatigayon nila nga mga community dialogue kag information drives sa Barangay Local Government Units, nahatagan sang ihibalo ang mga pumuluyo nga kabangdanan sang boluntaryo nga pagsungka sang ila sini tagsa ka mga hinuptanan nga armas-luthang.
Nahibaluan nga ang Maneuver Platoons ang asud-asod nga naga pakig-upod sa tagsa ka mga kabarangayan kag gina-kampanya ang Philippine National Police Best Practice nga “Armas baylo Bugas”.
Samtang, padayon nga nagapahanumdom ang mga kapulisan sa may mga hinuptanan pa nga mga armas-luthang nga mahimo maka-avail sang “Armas baylo Bugas” nga programa.
