ROXAS CITY – Dead on arrival nga ginpadangat sa ospital ang 38-anyos nga lalaki matapos bumunggo ang ginamaneho nga motorsiklo sa isa ka salakyan sa National highway sang Barangay Bolo, Roxas City.
Ginkilala ang napatay nga si Ronie Cabrera kag residente sang Barangay Bahit, Panitan, Capiz.
Samtang, ginkilala naman ang driver sang Mitsubishi Strada kay Jacinto Blacano 49-anyos sang Brgy. Loctugan, Roxas City apang ang nasambit nga salakyan ang ginapanag-iyahan ni Atty. Remia Fuentes Bartolome.
Sa interview sang Bombo Radyo kay Atty. Bartolome, ginpahayag sini nga nagikan sila sa banwa sang Panitan matapos nga nagpanghatag sang relief goods sa mga apektado sang pagbaha apang sang pabalik na sila sa syudad sang Roxas nasugata nila ang motosiklo nga madasig ang pagpadalagan.
Dugang pa sini nga sang nakita sang iya driver ang motorsiklo naghinay-hinay ini pundo apang aksidente ini nga bumunggo sa ila salakyan.
Ginaalegar nga naglapaw sa linya si Cabrera sang nadulaan ini sang control sa pagmaneho.
Bangud sa natabo, madasig nga ginpadangat sang mga rescuers si Cabrera sa ospital para sa pagbulong, apang ini ang ginbawian gid sang kabuhi.
Sa karun, padayon pa ang imbestigasyon sang kapulisan sa nasambit nga insidente.
