ROXAS CITY – Apat ka mga empleyado sang Du Ek Sam appliances store sa Roxas Avenue, Roxas City ang gilayon nga ginpaidalom sa 14-day home quarantine period matapos nga nakompirmar nga nakapadulong sa amo nga edipisyo ang 47 anyos nga babaye nga isa ka Returning Overseas Filipino (ROF) nga kalakip sa 10 ka mga panibag-o nga nagpositibo sa coronavirus disease (COVID-19) sa Capiz.
Ini ang ginkompirmar mismo sang store manager nga si Bebelyn Ilisan sang mainterview sang Bombo Radyo.
Suno diri nga ginpadulungan sila sang mga katapo sang City Health Office kag gin-tsekyar ang ila rekord kun nakapadulong diri ang nasambit nga pasyente.
Diri nakompirmar nga nag-upod ang amo nga pasyente sa iya utod nga nagbakal sang appliances sa amo nga establisyemento apang nagpungko gid lamang ini sa sulod sang sila ang nag-abot.
Bilang pagtuman sa pagsulundan, gilayon nga ginpauntat sang duty ang apat ka empleyado kag 14 diyas nga magapaidalom sa home quarantine kasunod sang pag-rapid test sa ila.
Ang apat ka empleyado suno diri ang duha ka babaye kag duha ka lalaki nga lunsay residente sang Roxas City.
Ang isa sa ila ang nag-asister sa pagbakal sang appliances sang utod sang pasyente; isa ang nag-isyu sang resibo; isa ang nagbaton sang bayad; kag isa naman ang nag-deliver sang ginbakal nga unit padulong sa balay sang pasyente.
Suno diri nga wala pa man ang contact-tracing sa mga nakahalubilo sang amo nga pasyente, adlaw-adlaw na nila nga gina-disinfect ang nasambit nga pasilidad.
Apang nagahulat sa karon ang tagdumalahan sang nasambit nga pasilidad para sa schedule sang pag-disinfect sang mismo mga katapo sang City Health Office.
Limitado sa karon sa 10 ka mga customers ang mahimo maakomodar sa sulod sang nasambit nga establisyemento kag may ginapatuman man nga mga minimum health standards.
