ROXAS CITY – Nalakip ang apat ka mga banwa sang Capiz sa ‘watch list’ sa ginpatigayon nga Physical Joint Security Control Center (PJSCC) nga ginakabug-osan sang Commission on Elections (COMELEC), Philippine Army (PA), Philippine National Police (PNP) kag Philippine Coast Guard (PCG).
Ini ang ginkumpirmar ni Atty. Salud Milagros Villanueva, Provincial Election Officer, sang mainterview sang Bombo Radyo.
Suno diri, ini nga mga banwa ang ginpaidalom sa apat ka Kategorya – Green, Yellow, Orange kag Red.
Indi makaalarma ang yara sa Green, may political rivalry naman sa idalom sang Yellow, may presensiya sang mga rebelde ukon armado nga grupo sa idalom sang Orange, samtang kombinasyon sang Yellow kag Orange ang ginpaidalom sa Red nga kategorya.
Sa nasambit nga mga kategorya, nalakip sa Yellow ukon may political rivalry ang banwa sang Pilar, samtang yara sa Orange category ukon may ginabantayan nga presensiya sang rebelde nga grupo sa mga kabanwahanan sang Tapaz, Dumalag kag Maayon.
Ginpahayag man sang election officer nga ini nga mga banwa ang mas pagatutukan samtang nagahilapit ang National kag Local Elections sa bulan sang Mayo, sini nga tuig.
