ROXAS CITY – Natigayon nga ma-rescue ang apat ka mga mangingisda matapos nga nagkulob ang ila ginasakyan nga motorbanca sa kalalawran nga sakup sang Sitio Nipa, Barangay Culasi, Roxas City.
Ginkilala ini sanday Arman Amangca, boat captain, kag mga crew nga sanday Romel Dela Cruz, 23-anyos, Nemecio Ayayo, 60-anyos kag Richard Delos Reyes, 52-anyos nga mga residente sang Purok 1, Brgy. Libas, sini man nga syudad.
Sandig sa report nagikan sa mga katapo sang Philippine Coast Guard (PCG)-Capiz, samtang nagapapuli na kaina sang kaaganhon ang mga mangingisda, hinali nalang nga ginhampak sang mabaskog kag dalagkuan nga balud ang ila sakayan.
Gilayon nga naglulumpat ang mga ini kag naglangoy padulong sa manabaw nga porsyon sang dagat kag na-rescue sang mga residente, katapo sang CDRRMO kag PCG-Coast Guard.
Masuwerte nga wala nakaangkon sang patal nga pilas ang mga persona apang wala nila masalbar ang mga nakuha nga isda.
Nahibaluan nga wala man sang ginpaguwa nga abiso ang otoridad nga ginadumilian ang pagpalayag kahapon nga adlaw.
