ROXAS CITY – Dakop ang apat ka mga sakayan pangisda matapos nga nadakpan sa akto nga nagapatigayon sang iligal nga pagpangisda sa magkatuhay nga mga kabanwahan sa probinsya sang Capiz.
Una diri, nadakpan ang duha ka mga sakayan nga nagapatigayon sang iligal nga pagpangisda sa kalalawran nga sakop sang banwa sang Pilar, Capiz.
Ang nasambit nga sakayan amo ang Fishing Banca SM sakay ang boat captain nga si Arnel Recaplaza 42-anyos kag isa ka sakayan nga wala sang pangalan nga sakay naman ang boat captain nga si Reynaldo Arrojado 52-anyos kaupod ang tatlo ka mga crew nga lunsay mga residente naman sang Barangay Libas sining siyudad.
Magluwas diri, nadakpan man nga nagapatigayon sang iligal nga pagpangisda sa kalalawran nga sakop sang Barangay Balaring, Ivisan, Capiz ang duha ka mga motorbanca nga MB SNN-XVII sakay sanday Orlando Nepucemo kag duha ka mga crew nga lunsay mga residente sang Barangay Libas sining siyudad.
Nadakpan man nga nagapatigayon sang iligal nga pagpangisda sa lugar ang motorbanca nga MB Lady Zoe sa diin sakay sanday Eric Bongala kag kaupod sini nga 11 ka mga crew.
Mahibaluan nga wala sang ginprisentar nga mga nagakaigo nga dokumento ang apat ka mga nasambit nga sakayan pangisda rason nga gindakop ini sang mga katapo sang bantay dagat.
Narekober naman sa posesyon sang mga nagkaladakpan nga mga mangingisda ang pila ka mga fishing paraphernalia nga ginamit sang mga ini sa iligal nga pagpangisda.
