ROXAS CITY – Preparado na ang 44 tanan ka mga Capizeño nga mangin kabahin sang delegasyon sang Rehiyon 6 para sa nagahilapit nga Palarong Pambansa 2019 nga patigayunon sa Davao City.
Suno kay Mr. Ronnie Reteracion, sports coordinator sang Department of Education (DepEd) Capiz Division, may yara sang gin-alokar nga pondo ang probinsya nga 1.2 milyones pesos para sa mga atleta.
Ang 700 mil pesos magahalin sa probinsya samtang ang 500 mil pesos ang mangin counterpart sang city government.
Magapadulong naman sa probinsya sang Ilo-Ilo sa Biyernes Santo ukon Abril 19 ang mga delegasyon sang Capiz kag magasakay sa barko las’ 3 sa mag-aga padulong sa Davao City.
Apang, ang iban nga kabahin sang delegasyon nga sarang makabakal sang ticket ginpakamaayo na lamang nga magsakay sa eroplano para mangin matawhay ang ila nga biyahe padulong sa Davao City.
May yara naman sang lima ka mga indibidwal nga una na nakapadulong sa Davao para mag-facilitate sa ila nga billeting area.
Natalana naman nga magasugod sa Abril 27 tobtob Mayo 24 ang nasambit nga sporting event nga pasakupan sang mga atleta gikan sa magkatuhay nga rehiyon sa Pilipinas.
Nahibaluan nga masobra 830 ang mangin kabahin sang delegasyon sang Rehiyon 6 nga magapasakop sa nasambit nga aktibidad.
Samtang, opisyal na nga nangin kabahin sang delegasyon sang Region 6 si Jimwell de Felipe, nga nabutang sa kontrobersiya bangud wala malakip sa una nga shortlist sang mga atleta sang Region 6.
