ROXAS CITY – Ginkumpirmar ni Roxas City PNP Chief PLTCOL. Lumyaen Lidawan nga bag-o lang guwa sa prisohan ang 45-anyos nga lalaki nga nasapwan-patay sa Circumferential Road sakop sang Brgy. Dayao sining syudad.
Suno kay Lidawan nga walo ka tuig napriso si Borleo sa New Bilibid Prison bangud sa kaso nga rape kag sang Disyembre 2024 lang ini nakaguwa. Matandaan nga sang Pebrero 14, nasapwan na lang sang isa ka tricycle driver ang biktima nga nagahigdaon kag duguon sa tunga sang karsada sa nasambit nga lugar kun sa diin may pilas ini sa ulo kag likod.
Pahayag pa ni Lidawan nga positibo nga ginkilala ni Raffy Borleo ang utod sini nga nasapwan-patay nga si Rio Posadas Borleo, nga residente sang Brgy. Marita, banwa sang President Roxas.
Sa karon wala pa sang person of interest ang kapulisan sa nasambit nga insidente kag nagapadayon sa gihapon ang ila imbestigasyon.
Nagapanawagan naman si PLTCOL Lidawan sa mga katrabaho sang biktima kag sa may ara nahibaluan nga impormasyon angut sa insidente nga magpalapit sa ila talatapan agud makabulig solbar sang krimen.
