ROXAS CITY – Gin-aresto ang isa ka 47-anyos nga lalaki, bangud sa gina-alegar paghupot sang armas –lutahng akg pagduso sang illegal nga droga sa Sitio Proper 1, Barangay Parian, Sigma Capiz.
Ginkilala ang gindakop pinaagi sa gin-implementar nga search warrant sang gintingub nga puwersa sang Sigma MPS, 2nd Capiz Provincial Mobile Force Company kag PDEU kay Baltazar Borres Bastian, nga residente man sang nasambit nga lugar.
Sa interview sang Bombo Radyo kay Police Captain Dennis Losbañez, chief of police sang Sigma Municipal Police Station, ginpahayag sini nga may mga nakaabot sa ila nga reklamo batok sa suspetsado sa pagduso sang illegal nga droga kag masami nga pagtuga sang kinagamo sat ion nga naka-inom inum ini.
Dugang pa nga, nagapalupok pa ini sang ginahuptan nga armas-luthang kun mahubog rason nga naalarma man ang pila ka mga pumuluyo sa lugar bangud tuman ka delikado ang iya nahimo.
Positibo nga nakit-an sa balay sang suspetsado , base man sa nakasulat sa search warrant ang 6 ka bulto sang illegal nga droga , granada kag isa ka unit sang caliber 38 revolver .
Sa pihak nga bahin, sa separado nga interview kay Hon. Genevive Balmoja, Barangay Kagawad sang amo nga barangay, ginpahayag sini nga madamu na sang reklamo ang napalab-ot sa Barangay Parian natuhoy sa pagtuga sang kinagamo ni Bastian sa tion nga ini ang maka-inom kag daw halos adlaw-adlaw nalang nga may nagasulod sa iya puloy-an nga indi kilala nga mga persona.
Samtang, ginpahayag ni Balmoja nga naga-isahon lamang sa iya puloy-an ang suspetsado kag indi basta-basta makasulod bangud nakapalibot ini sang pader nga kun maghimo sang indi maayo sa sulod indi ini makit-an.
Sa karon, padayon pa ang ginahiwat nga imbestigasyon sang mga kapulisan sa lugar.
