ROXAS CITY – Kapin 48 ka mga Militia ng Bayan (MB) kag miyembro sang rebelde nga New Peoples Army (NPA) sa banwa sang Cuartero ang nagbaton sang bulig-pinansiyal pinaagi sa Enhanced Comprehensive Local Integration Program (E-CLIP) sang gobyerno.
Ini ang ginpahayag ni Lt. Col. Joel Benedict, ang commanding officer sang 61st Infantry Battalion sang Philippine Army sang mainterview sang Bombo Radyo.
Suno kay Batara, sa nasambit nga numero, 47 sa mga ini ang makabig nga Militia ng Bayan (MB) samtang isa naman ang regular nga miyembro sang rebelde nga grupo.
Mahibaluan nga nagbaton sang P50, 000 nga livelihood assistance kag P15, 000 nga immersion assistance ang regular nga miyembro sang rebelde nga grupo samtang tag-P15, 000 naman ang mga Militia ng Bayan.
Suno kay Batara nga nagsungka ang nasambit nga mga indibidwal pinaagi man sa community support program sang militar rason nga naganyat ang mga ini nga magbalik na sa sabak sang gobyerno.
Magluwas sa bulig-pinansiyal, madamo pa sang oportunidad para sa ila nga kabahin sang mga programa sang gobyerno sa pagpapas sa insurhensiya pinaagi sa ginatanyag nga mga trainings kag livelihood programs.
Padayon naman ang kampanya sang hanay sang militar sa pagkumbinse sa mga miyembro sang rebelde nga grupo nga talikdan na sang mga ini ang ila hublag kag magbalik sa sabay sang gobyerno.
