ROXAS CITY – Nakaaresto sa karon ang lima ka mga indibiwal sa separado nga mga presuhan sa Capiz matapos nga gindakop sang mga kapulisan bangud sa paglapas sa ginapatuman nga curfew hours sa probinsiya.
Una diri, naaresto sa banwa sang President Roxas sanday Vincent Belarde, Enzo Bade, Robert Besonia, lunsay residente sang Marita, sa nasambit nga banwa.
Mahibaluan nga yara sa idalom sang impluwensiya sang makahulubog nga ilimnon ang tatlo sang ginsita sang isa ka punong barangay bangud may plano pa ang mga ini nga magbakal sang ilimnon sa pihak sang ginapatuman nga curfew.
Nagpakatig-a pa ang tatlo rason nga napilitan ang punong barangay nga magpanawag sang mga pulis agud madakpan ang mga ini.
Samtang naaresto man sang mga pulis sa banwa sang Mambusao ang mag-abyan nga sanday Vincent Acebog, 33 anyos kag Christian Adaniel, 30 anyos sang Baragay Burias bangud nagalagaw pa ang mga ini sakay sa isa ka motorsiklo sa pihak sang ginapatuman nga curfew hours.
Mahibaluan nga ginapatuman sa karon sa bilog nga probinsiya sang Capiz ang curfew hours humalin alas 8 sa gab-i tubtob alas 5 sa aga base sa Executive Order No. 11, series of 2020 nga ginpapanaog ni Capiz Governor Esteban Evan Contreras.
