5 ka panibag-o nga kaso sang Coronavirus Disease ukon Covid-19 sa probinsya sang Capiz, narekord

ROXAS CITY – Liwat nga nakarekord sang 5 ka panibag-o nga kaso sang Coronavirus Disease ukon COVID-19 ang probinsya sang Capiz.

Ini ang base sa ginpaguwa nga datos sang Department of Health Western Visayas sang Sabado, Hulyo 25, 2020.

Ang mga nagpositibo amo ang 33-anyos nga babaye kag residente sang banwa sang Pres. Roxas, Capiz.

Ikaduha ang 27-anyos nga lalaki sang banwa sang Maayon, Capiz.

Ikatatlo ang 23-anyos nga lalaki sang Roxas City.

Ikaapat ang 21-anyos nga lalaki sang banwa sang Maayon, Capiz kag ang ikalima naman ang 45-anyos nga lalaki sang banwa sang Pilar, Capiz.

Sa karon, naglab-ot na sa 41 ang kabug-usan nga kaso sang COVID-19 sa probinsya sang Capiz.