ROXAS CITY – Desidido nga magpasaka sang nagakaigo nga kaso ang 57-anyos nga lalaki nga ginbuno matapos nagtambag sa Barangay Agojo, Panay, Capiz.
Mahibaluan nga ginkilala ang biktima kay alyas ‘Wil’, 57-anyos, trabahador, kag residente sang Barangay Cagay, Roxas City, samtang ang suspek ang ginkilala kay alyas ‘Bert’, 47-anyos, Fish pond caretaker, kag residente sang nasambit nga lugar.
Sa interview sang Bombo Radyo kay PCapt. Ronald Ton-ogan hepe sang Panay Municipal Police Station, ginpahayag sini nga ginahulat na lamang nila nga makaguha sa ospital ang biktima agud maka-file sang nagakaigo nga kaso batuk sa suspek.
Suno kay Ton-ogan, sa kaangay sini nga hitabo kinahanglan nga mangin responsable sa butang nga himuon kag nakahibalo nga kontrolon ang kaugalingon.
Matandaan nga samtang naga-inom inom ang biktima kag ang suspek sa balay ni Jovanie ugangan sang suspek kaupod si alyas ‘Noli’, 38-anyos, isa man ka manugbantay sang punong kag residente sang Barangay Dulangan, Pilar, Capiz, hinali na lamang nga may nagluntad sang indi pag-intindihanay sa tunga sang suspek kag alyas Noli.
Bangud sini, hinali na lamang nga nagkuha sang kutsilyo ang suspek kag ginbuno ang biktima kag naigo sa iya nga tyan.
Gilayon man nga ginpadangat sa isa ka pribado nga hospital abf biktima sining syudad para sa nagakaigo nga pagbulong samtang natigayon naman nga na-aresto sang mga kapulisan ang nasambit nga suspek.
