ROXAS CITY – Pilason ang pito ka mga persona matapos ang nagluntad nga rambol sa Barangay Agmalobo, Ivisan, Capiz.
Base sa inisyal nga imbestigasyon sang Ivisan Municipal Police Station nga ginkomprontar ni Melvin Mendoza ang isa ka menor de edad kun sin-o ang naghaboy sang ila ido rason nga hinali na lamang nga nag-angkon sang indi pag-intiendihanay kag nagresulta sang kinagamo sa magkatuhay nga grupo sang nasambit nga mga persona.
Nahibaluan nga nag-angkon sang pilas sa lawas sanday Delfin Mendoza, Ronnie Doroteo, Jolito Guya, kag Lito Mark Guya nga gilayon naman gindala sa ospital agud madapatan sang nagakaigo nga pagbulong.
Samtang, pilason man ang grupo sang menor de edad nga ginalakipan nanday Marvin Antonio, Kris John Guya kag Melvin Mendoza.
Nahibaluan nga lunsay yara sa idalom sang impluwensya sang makahulubog nga ilimnon ang nasambit nga mga persona sang natabo ang insidente.
