ROXAS CITY – Aga pa nga nagpadulong sa Agtalin Shrine sa Dulangan, Pilar, Capiz ang 90-anyos nga si Lola Felisa Ramos, taga Barotac Viejo, Iloilo, agud tumanon ang iya panaad sa tion sang Semana Santa.
Sa pagpakig-angut sang Bombo Radyo kay Lola Felisa, ginpahayag sini nga dalaga palang siya tubtob nagpamana kag nagkaapo deboto na ini sang birhen Maria, kag sang gintukod ang Agtalin Shrine, nagsugod ini sa pagsaka sa amu nga balaan nga lugar.
Dako man ang pagpati sang tigulang nga pinaagi sa iya pagtuo kag panaad, ini man ang rason nga mabakod ini sa gihapon sa iya pang-edaron kag kaluy-an nga wala ini ginatakdan sang malala nga balatian subong man ang iya mga kabataan.
Sang ginpamangkot si Lola Felisa sang iya sikreto sa maayong lawas, ginsiling sini nga likawan ang pagkaon sang karne sang baboy ukon manok, sa baylo utan lamang, prutas ukon masustansiya nga pagkaon.
Mensahe sini sa mga pamatan-on sa karon nga henerasyon, nga magpamalandong subong nga semana santa, magkabuhi nga may pagtuo kag kahadlok sa Ginoo.
