Ginmanduan sang Energy Regulatory Commission (ERC) ang Manila Electric Company (Meralco) nga ibalik sa mga customer sini ang ginabulubanta nga P2.64 bilyon nga sobra nga nakolekta halin sa distribution charges sa Enero tubtob Hunyo 2026.
Suno sa ERC, nahibaluan sa pagbusisi sang aktwal nga kita kag benta sang Meralco nga naglapaw ang nakolekta nga distribution charges sa gin-aprubahan nga distribution rate.
Yara sa P0.1020 kada kilowatt-hour ang average nga refund nga ginapatuman sa sulod sang anum ka bulan, nga mas malip-ot sa 12 ka bulan nga refund period nga una nga ginpatuman sang kompanya.
Ibutang ang refund sa bulanan nga bill sang mga customer sa idalom sang label nga “(Refund)/Collect,” apang ginpaathag sang ERC nga temporaryo pa ang kantidad sini kag mahimo nga magbag-o depende sa resulta sang katapusan nga evaluation sang komisyon.
Samtang, Padayon nga gina-monitor sang ERC ang implementasyon sang refund agud masiguro nga mabalik ang bug-os nga kantidad nga dapat maibalik sa mga customer.
