ROXAS CITY – Wala napunggan sang mga himata sang tatlo ka pamatan-on nga napatay bangud sa aksidente nga nagluntad sa Arnaldo Boulevard, Barangay Baybay Roxas City sang Disyembre 10, 2023 nga kwestyonon ang hulag sang imbestigasyon sang mga kapulisan angut sa insidente.
Suno kay Hon. Wendie Doronio, SB member sang Maayon kag tiyo sang isa sa biktima, daw kaangay ginapa-awat-awatan sang kapulisan ang imbestigasyon, kasubong sang pagkadelay sa pagkuha sang kopya sang CCTV footage sa isa ka banko, availability sang imbestigador kag ginapahayag wala natumod kun yara sa impluwensya sang makahulubog nga ilimnon.
Sabat naman ni PLtCol. Francisco Paguia, hepe sang Roxas Component City Police Station nasumiter na sa Hall of Justice ang kopya sang CCTV footage nga nakuha sa Bangko Sentral ng Pilipinas sang Enero 19.
Aminado ini nga nadugayan bangud may proseso nga ginasunod ang kapulisan agud maka-secure sang kopya sang CCTV footage bilang ebidensya sa natabo nga insidente.
Samtang, ginkumpirmar man ni Paguia nga ang imbestigador nga in-charge sa kaso, ang nalakip sa mga gin-augment sa Kalibo, Aklan para sa selebrasyon sang Ati-Atihan Festival 2024 apang mahimo ini nga makapauli pananglitan may yara sang hearing ukon subpoena.
Dugang pa sini, nga wala natumod kun yara sa impluwensya sag makahulubog nga ilimnon ang driver suspect bangud wala pa sang alcohol breath analyzer ang Roxas City PNP, isa ka sahi sang device nga nagadeterminar kun yara sa impluwensya sang makahulubog nga ilimnon ang driver sang salakyan ukon motorsiklo.
Kaangut diri, ginasiguro ni Paguia nga patas kag wala sang ginapadampigan ang mga kapulisan sa amu nga insidente.
Matandaan, ginbawian sang kabuhi ang 3 ka pamatan-on kag na-ospital ang 2 pa matapos gin-arado sang salakyan ang ginamaneho nga mga motorsiklo sang mga biktima san g Disyembre 10, 2023.
