ROXAS CITY – Ginpanginwala sang pinuno sang Traffic Management Unit (TMU) ang alegasyon sang colorum tricycle driver nga gintutukan ini sang armas-luthang kag tuyo pa nga kastiguhon sang anum ka mga traffic auxilliaries sang Agosto 26, sa Barangay Tanque, Roxas City.
Sa interview sang Bombo Radyo kay Mr. Gonzalo Andrada, TMU head, ginsiling sini nga wala sang kamatuoran ang akusasyon ni Romel Digan bangud hugot niya nga ginadumilian ang pagbitbit sang armas-luthang ilabi na kun on-duty.
Suno diri, indi basta-basta makadala sang armas-luthang sa publiko ang isa ka persona ilabi na kun wala ini sang lisensya.
Nagapati si Andrada, nga himu-himo lang ni Digan ang akusasyon bilang pagbalos bangud makaduha na ini ka beses nga nadakpan nga nagabiyahe gamit ang colorum nga traysikol.
Matandaan nga ba-se sa nangin pahayag ni Digan, nagabiyahe ini kag himata man ang iya pasahero nga gindul-ong gikan sa Barangay Tanque padulong sa isa ka dako nga mall sa bahin sang Arnaldo Blvd apang natukiban sini nga ginasundan siya sang TMU patrol car.
Aminado si Digan nga wala siya nagpondo kag nagpinalagas bangud sa kakulba kag nagdesisyon nga magpanago sa katalunan sa bahin sang Taque Ilawod, apang nakita siya sa gihapon.
Ginpahayag sini nga gintutukan siya sang calibre .45 nga armas-luthang kag ginaalegar gintuyo kastiguhon nanday Roger Laurilla (nagtutok sang armas-luthang), Joenel Balatayo (may dala nga tubo), Ariel Viilareal (naghana suluk-sulok), kag Michael Mallorca (driver sang pick-up patrol).
