Nagpaandam ang Philippine Institute of Volcanology and Seismology (Phivolcs) nga posible nga magresulta sa “eruptive unrest” kag pagtaas sang alert level sa mga probinsya sang Negros halin sa Alert level 2 matapos mabalhag ang pinakamataas nga emission sang asupre gikan sa Bulkang Kanlaon.
Sa ginpaguha nga advisory sang ahensiya, ang volcanic sulfur dioxide (S02) gas emission halin sa summit crater sang Kanlaon base sa campaign Flyspec measurement ang may average nga 9,985 tonelada kada adlaw. Ini na ang pinakamataas nga emisyon halin sa bulkan nga nabalhag humalin sang magsugod ang instrumental gas monitoring.
Natalupangdan man sang ahensya nga ang sulfur dioxide emission ng bulkan ang nagtaas sa karon sang average nga 3,468 tonelada kada adlaw humalin sang Hunyo 30 eruption.
Nabalita ang sulfuric odors sa mga lugar sang Brgy. Ilijan sa Bago City; Brgy. Ara-al kag Brgy. San Miguel sa La Carlota City; kag Brgy. Masulog, Brgy. Linothangan, kag Brgy. Pula sa Canlaon City.
Kaangut sini, nagpaandam ang Phivolcs nga ang madugay nga pagtinir sa sulfur dioxide ang posible nga magdulot sang implikasyon sa ikaayong lawas kasubong sang pagpangalatol sang mata, tutunlan kag respiratory tract.
Ginpanugyanan man sang bureau ang publiko nga likawan ang pagsulod sa four kilometer-radius Permanent Danger Zone agud mabuhinan ang mga katalagman kaangay sang pyroclastic density currents, ballistic projectiles, rockfall kag iban pa.
Sang damlag lang, nalista ang kabug-usan nga 288 volcanic-tectonic earthquakes sa bulkan sumugod alas-8:30 sang gabi. Nabatyagan ang Intensity II sa pila ka barangay sang Canlaon City, Negros Oriental.
