Daku ang mabulig sang Alternative Dispute Resolution (ADR) sa pagresolba sang mga problema legal sa pamilya.
Sa interview sang Bombo Radyo kanday Atty. Margaret Raizza Andaman, Executive Director sang Office of the Alternative Dispute Resolution-Department of Justice, Dean Rodel Taton kag Dean Amado Dimayuga, President and Chairman sang Philippine Institute of Dispute Resolution and Arbitration (PIDRA), ila ginpahayag nga ang Alternative Dispute Resolution (ADR) ang isa ka pamaagi kun sa diin ang partido ang mahimo makapili sang ila nga mediator ukon third party neutral santo sa Republic Act 9285 nga indi na mag-agi sa korte.
Suno pa sa ila, ang mga kaso nahanungod sa family conflict ang isa sa mga mahimo nga gamitan sang Alternative Dispute Resolution (ADR) bangud gina-encourage sini nga magdayalogo ang duwa ka partido antes nga pasakaon ang kaso sa korte.
Pahayag pa nila, sa pamaagi sang Alternative Dispute Resolution (ADR), makapakigbahin sang solusyon ang tagsa ka bahin sa kun paano maresolba ang nasambit nga problema sa tunga nila sa pag-alalay sang ila napili nga mediator.
Nahibaluan nga ginaselebrar ang Alternative Dispute Resolution Week humalin Oktubre 16 tubtob 24 subong nga tuig 2025.
Dugang pa sang mga natungdan, kinahanglan ang pag-ugyon sang isa ka pamilya, estoryahan sang maayo ang mga problema agud nga malikawan ang away nga nagatuga sang indi pag-intindihanay.
