ROXAS CITY – Daku ang pagpati sang amay sang missing nga dalaga nga patay na ang anak matapos ang masobra 4 ka bulan nga pagkadula.
Suno kay Leo Bulagao, kun buhi pa si Jessa Roxas indi gid ini magduha-duha nga magcontact sa ila bisan anu kabudlay ang sitwasyon apang masobra 4 kabulan na ang nanligad kag katapusan nga komunikasyon sini amu sang Setyembre 12 sa diin ginapahayag kaupod sini ang abyan nga si ‘Paro.’
Mahibaluan, nga magapauli kuntani si Roxas sa Iloilo sang Setyembre 13 apang wala na ini na-contact tubtob sa karon.
May mga nababaton naman nga impormasyon ang pamilya nga ginaalegar ginkidnap, ginpatay kag ginlubong si Roxas sa Barangay Bahit, Panitan Capiz gani nagpangayo ang mga ini sang bulig sa LGU-Barotac agud mapadulongan ang lugar kun sa diin ginapatihan ginlubong ang dalaga.
Apang suno kay Leo, sa pagpadulong sang kapulisan sa lugar wala ang mga ini gintugutan sang tag-iya sang duta nga magkutkot bangud sa kakulangan sang dokumento nga ginpresentar.
Mahibaluan, magatindog kuntani nga witness si Roxas sa pagpangluthang-patay sa nobyo nga si Joebert Nepomuceno sa Barangay Lanot, Roxas City sang Setyembre 6 apang wala na ini natigayon pa matapos nga ini ang madula 1 ka semana matapos ang insidente.
