ROXAS CITY – Ginpabugal sang anay Philippine Army Officer ang kadalag-an nga naabot sang iya bata matapos nga nag-gradwar bilang Top 3 sa Philippine Military Academy (PMA) Bagsik Diwa Class of 2022 kag wala sini napunggan nga maghibi nga nalumpawasan sang iya bata ang mga pagtilaw sa sulod sang academy.
Si Cadet First Class Ian Joseph Bragancia, ang residente sang Barangay Casalsagan, Pototan Iloilo.
Sa interview sang Bombo Radyo kay Ireneo Bragancia, amay sang nag-TOP 3 nga kadete suno diri wala sini ginalauman nga magasulod sa Philippine Military Academy (PMA) ang iya bata bangud indi madali ang pangabuhi sang isa ka PMA Cadet.
Apang, nagpakita ini sang interes sang nagpasakup ini sa Reserved Officer Training Corps (ROTC), kag sang ikatatlo ka tuig sa kolehiyo naglisensya nga makuha sang entrance exam sa PMA.
Suno kay Bragancia, posible nga naimpluwensyahan sini ang iya anak bangud isa man ini ka anay military officer.
Ginpabugal sini ang iya nga bata, bangud naga-excel gid ini sa academic, nangin valedictorian sang elementary, high honor sang high school kag isa ka DOST scholar sang college sa kurso nga Bachelor of Science in Molecular Biology and Biotechnology sa UP Diliman.
Dako ang pasalamat kag kalipay nga nabatyagan ni Bragancia kag ang bug-os nga pamlya bangud nalumpawasan sini ang apat ka tuig sa sulod sang PMA kag nakit-an na nila ang gintinamakasan sang ila bata.
Mahibaluan nga ginpatigayon kagaina sang aga ang Commencement Exercises sang PMA ‘Bagong Sibol sa Kinabukasan Didigma Hanggang sa Wakas’ (BAGSIK DIWA) Class of 2022 sa Baguio City kag ganap na nga 2nd Liutenant si Bragancia sa Philippine Army.
