Natigayon nga nadakpan sang mga katapo sang Roxas Component City Police Station ang anak nga suspek sa pagpanglabo sa iya nga kaugalingon nga amay sa Barangay Dinginan, Roxas City, Capiz.
Ang biktima amo si Dionisio Arciga, 80-anyos, samtang ang suspek amo si Jonery Arciga, 56-anyos kag lunsay residente sang nasambit nga lugar.
Sa interview sang Bombo Radyo kay Police Chief Master Sergeant Ramil Arcangeles, Spokesperson sang Roxas Component City Police Station, pamaagi sa kooperesyon sang mga pumuluyo sang amo nga barangay nadakpan ang suspek.
Suno kay Arcangeles, sandig sa ila nga imbestigasyon, nagaguwa nga ang natipon nga hiligut-anon kag kalain sang buot sa amay ang rason sang pagpanglabo sang suspek.
Nahibaluan nga samtang nagahigda sa duyan ang amay sa sulod sang ila nga puluy-an, hinali nga nag-abot ang anak kag ginpangbugto ang higot sang duyan antes nga ginlabo ang biktima gamit ang bolo.
Bangud sini, nag-angkon sang mga pilas sa nagkalain-lain nga bahin sang lawas ang biktima kag sa subong nagapabilin na nga estable ang kondisyon sa ospital.
Samtang, ginahulat naman sang mga kapulisan ang desisyon sang pamilya sa nagakaigo nga disposisyon angut sa nasambit nga insidente.
