ROXAS CITY – Presuhan ang ginsudlan sang anak sang Traffic Management Unit (TMU) head kag retirado nga pulis matapos nadakpan sa drug buy bust operation sang Provincial Drug Enforcement Unit (PDEU) sa Homesite, Barangay Lawaan, sining syudad.
Ginkilala ang subject person nga si John Mark Hervias 30-anyos sang nasambit nga lugar.
Sa interview sang Bombo Radyo Roxas kay Senior Inspector Hilbert Gervero, team leader sang PDEU, madugay na nila nga ginamonitor ang aktibidad ni Hervias tobtob ginpatigayon ang operasyon.
Kalakip sa mga parokyano ni Hervias ang mga drug personalities nga wala sa gihapon nagauntat sa iligal nga aktibidad.
May lead naman ang mga pulis kun sa diin nagakuha sang suplay sang droga si Hervias.
Kalakip sa mga narekober sa suspek ang duha ka sachet sang ginapatihan shabu, digital weighing scale, improvised glass tooter, .38 caliber revolver nga may 5 ka bala kag P1,000 nga marked money.
