ROXAS CITY – Ginpatpat sang anay chief sang Maintenance Division sang Roxas Memorial Provincial Hospital (RMPH) ang mga kakulangan sang ospital sa iya pagtambong sa ikaduha nga adlaw sang legislative inquiry in aid of legislation sang Sangguniang Panlalawigan.
Suno kay Engineer Abner Palete nga sang nagpungko ini sa amo nga posisyon sadtong Enero tubtob Agosto 2019 natukiban na sini ang mga kakulangan sang nasambit nga ospital pag-abot sa power supply.
Una nga nakita ni Palete ang kakulang sang generator set nga kinahangalan nga may yara sang duha tubtob tatlo ka mga generator set ang RMPH agud sa tion nga masamad ang isa ka generator set may yara sang magamit.
Ikaduha ang Automatic Transfer Switch nga mahimu nga matransfer gilayon ang supply sang kuryente sa generator set.
Ikatatlo ang Uninterrupted Power Supply (UPS) nga magaserbe nga back-up nga indi insigida nga madula ang suplay sang kuryente.
Gindugang pa ni Palete nga wala nagasantu ang mga linya sang kuryente sa RMPH gikan sa Intensive Care Unit, Emergency Room, Operating Room kag iban pa.
Ginpahayag ni Palete nga nagakinahanglan sang kapin 16 milyones pesos ang RMPH para sa pagpakaayo sang mga natukiban nga problema.
Samtang dako naman ang pagpasalamat sang mga katapo sang provincial board sa pagtambong ni Palete sa ila legislative inquiry agud mahibaluan ang mga kinahanglan sang ospital sa tion nga may yara sang emerhensya.
