Boluntaryo nga nagsungka sa mga kapulisan sa banwa sang Mambusao ang isa ka lalaki nga nagpakilala nga anay katapo sang Communist Terrorist Group (CTG).
Sa nakuha nga impormasyon sang Bombo Radyo nagikan sa Mambusao PNP, ginapahayag nga nagpadulong sa ila talatapan ang wala na ginhingadlan nga persona.
Ginsiling sang amo nga persona nga nagsulod ini sa organisasyon sang tinalikdan nga tuig 2007 tubtob tuig 2018 kag nagserbe bilang team leader sang Red Fighter sang Eastern Front Komiteng Rehiyon Panay nga naga-operate sa nagkalainlain nga mga banwa partikular na sa banwa sang Maayon, Pontevedra, Pilar, President Roxas, Cuartero, Dumalag, Tapaz, kag Dumarao.
Dugang pa sini, nagdesider ini nga magsungka sa mga otoridad kag untatan na ang pagsuporta sa rebelde nga grupo bangud nareyalisar sang surenderee nga madugay na ini nga ginatiplang sang rebelde nga grupo.
Nagpalab-ot naman sang pinansyal nga suporta si Mayor Luzviminda Labao sa nagsungka nga CTG member.
