ROXAS CITY – Boluntaryo nga nagsungka sa kapulisan sa President Roxas ang isa ka lalaki nga nagpakilala nga anay katapo sang Communist Terrorist Group (CTG).
Sandig sa impormasyon nga nagikan sa President Roxas Municipal Police Station, ginsiling sini nga nagpadulong sa ila istasyon ang wala na ginhingadlan nga persona nga ginapahayag nagsulod sa organisasyon sang tinalikdan nga Disyembre 2017 kag nagserbe bilang Red Fighter sang Squad 2 sa idalom sang pagpamuno ni Ka Tonying kag Ka Allan, Central Front, KR Panay, nga naga-operate sa nagkalainlain nga Banwa sang Tapaz, Dumalag, kag Mambusao sa Capiz, kag Lambunao, Janiuay, kag Badiangan sa Iloilo.
Suno diri nga nagdesider nga magsungka sa otoridad kag untatan na ang pagsuporta sa rebelde nga grupo bangud nareyalisar sang surenderee nga madugay na ini nga ginatiplang sang NPA.
Kadungan sang iya pagsungka, ginsurrender man sini ang isa ka unit nga homemade .22 Caliber pistol (Break type) wala sang bala kag (1) unit sang live ammunition sang M203 grenade launcher.
Nagpalab-ot man sang suporta pinansyal si Mayor Receliste Escolin sa nagsungka nga CTG member. Sa karon, yara na sa paghinakop sang Pres. Roxas PNP ang nasambit nga armas-luthang para sa nagakaigo nga disposisyon.
