Nagapangatubang sa karon sa seryoso nga mga kaso kriminal kag administratibo ang aktres kag Barangay Captain sang Barangay Longos, Malabon nga si Angelika dela Cruz, kadungan sang iya nga kandidatura bilang bise-alkalde sang syudad sa palaabuton nga eleksyon.
Ginpasaka sa Office of the Ombudsman ang mga kaso batuk kay Angelika, kalakip ang kaso nga plunder nga may balor nga indi magnubo sa P70 million gikan sa pondo sang barangay.
Magluwas diri, nagapangatubang man ini sa 62 counts sang malversation of public funds, 18 counts sang failure to render accounts, kag illegal use of public funds, nga pareho nga paglapas sa mga probisyon sang Revised Penal Code. Dugang pa diri ang 64 counts sang paglapas sa Anti-Graft and Corrupt Practices Act (RA 3019) bangud sa ginaalegar mga indi mapaathag nga paggastos, nadula nga mga kagamitan, kag kuwestiyonable nga paggamit sang pondo sang barangay.
Kalakip man sa mga gin-file nga administrative complaints batuk kay Angelika ang ginapahayag pagpabaya sa iya katungdanan bilang punong barangay, masami nga pag-absent sang wala sang nagakaigo nga official leave, kag indi otorisado nga pagpasa sang iya mga katungdanan sa iya nga utod nga si Erick dela Cruz, isa ka barangay kagawad.
Kalakip man sa mga ginkasuhan amu ang barangay treasurer kag si Erick, nga mga utod ni Angelika. Ang treasurer ginpasakaan sang failure to render accounts kag illegal use of public funds, samtang si Erick naman ang nagapangatubang sa kaso nga grave misconduct.
Matapos magguwa sa media ang balita nahanungod sa mga kaso nga gin-file batuk sa iya, gilayon nga nagpaguwa sang hibubun-ot si Angelika pinaagi sa isa ka Facebook post sadtong Lunes, Abril 28, 2025. Sa iya nga post, ginpahayag sini ang pagkadismaya sa mahigko nga taktika sa politika kag ang iya pagkabalaka sa kaugalingon nga kaluwasan.
Sa karon, padayon nga ginasubaybayan sang publiko ang isyu samtang nagahilapit ang eleksyon subong nga midterm election.
