Posible nga makakas ang Los Angeles Lakers sa una nga elimination round sang 2025 playoffs matapos liwat nga gindominar sang Minnesota ang Game 4 sang nasambit nga serye, sa score nga 116 – 113.
Ginpangunahan liwat ni Anthony Edwards ang Wolves kag nagkamada ini sang 43 points, siyam ka rebounds kag anom ka assists sa sulod sang 44 minutos nga paghampang.
Nauyang ang panibag-o nga dominant nga performance sang Lakers superstar nga sanday Lebron James kag Luka Doncic matapos wala mapunggan ang 4th quarters scoring spree sang Minnesota. Nagkamada si Doncic sang 38 points samtang 27 points, 12 rebounds, kag walo nga assists ang gin-amot ni Lebron.
Mahibaluan nga uyat sang Lakers ang 10-point lead sa pagtakop sang 3rd quarter, sa score nga 94 – 84 sa bulig man sang episyente nga 3rd quarter scoring run sang nasambit nga hubon.
Subong man, ginlagas ini sang Wolves sa ulihi nga quarter kag narekord ang 32 – 19 run sa kabug-usan sang 12 mins. Sa 32 points nga napasulod sang Wolves sa ulihi nga quarter, 16 diri ang nahimo ni Edwards, kaupod ang duha ka ulihi nga free throw sa ulihi nga 11 seconds sang hampang, sa score nga 116 – 113.
Ginpilit pa sang Lakers nga ipatas sa 116 ang score, pulo ka segundos antes matapos ang hampang apang wala nakasulod ang 3-point jump shot ni Lakers guard Austin Reaves.
Isa sa nangin taktika sang Lakers amu ang ginbabad ang lima ka pinaka-episyente nga player sini nga sanday Lebron, Doncic, Rui Hachimura, Reaves, kag Dorian Finey-Smith sa kabug-usan nga 2nd half.
Ang nasambit nga team ang una nga team halin sadtong 1998 nga naggamit sa nasambit nga taktika. Apang, wala sa gihapon ini nagmadinalag-on bangud sa clutch performance sang Wolves.
Bangud sa panibag-o nga kadalag-an, isa ka daog na lamang ang kinahanglan sang Minnesota agud mag-abante sa Western Conference semifinals kag ipabatyag sa Lakers ang gentleman’s sweep.
Kun dalayon nga mag-abante, makontra sang Wolves ang magadaog sa tunga sang Golden State Warriors kag Houston Rockets nga yara sa karon sa 2-1, pabor sa GS.
