ROXAS CITY – Pilas ang naangkon sang apat ka mga indibidwal sa pagbungguanay sang duha ka mga motorsiklo sa Barangay Agustin Navara, Ivisan, Capiz.
Ginkilala ang mga imbolbado nga sanday alyas “chad”, 41-anyos, alyas “marg”, 51-anyos, lunsay residente sang probinsya sang Iloilo kag alyas “jen” , 24-anyos kag alyas “Mae”, 21-anyos, lunsay residente naman sang Basiao, Ivisan.
Sa impormasyon nga nakuha sang Bombo Radyo nagikan sa BFP Ivisan, gin pahayag nga samtang ginasubay nanday alyas “Jen” ang dalanon sa lugar sakay sa ila motorsiklo kaupod sang iya utod nga si alyas “Mae”, hinali nalang ang mga ini nga gin-agawan sang linya sang motorsiklo nga ginamaneho ni chad nga angkas naman ang iya magulang nga si “marg” padulong kun tani sa bahin sang Basiao agud magbakal.
Bangud sa natabo pareho nga nagkalatumba ang mga ini kag nag-angkon sang mga pilas sa magkatuhay nga parte sang ila lawas.
Madasig naman nga nagresponde sa lugar ang mga katapo sang Municipal Disaster Risk Reduction and Management Office (MDRRMO) Ivisan kag Ivisan Municipal Fire Station agud nga dapatan sang pauna nga pagbulong ang mga nagkalapilasan bag-o nga ginpadangat sa ospital.
Sa karon padayon pa nga ginabulong sa ospital ang mga imbolbado sa nasambit nga aksidente.
