ROXAS CITY – Masubo nga balita bangud nagpositibo sa red tide ukon may yara sang presensya sang organismo nga Pyrodinium Bahamense ang 4 sa 10 ka mga shellfish meat sample nagikan sa nagkalain-lain nga kalalawran nga sakop sang probinsya sang Capiz.
Ini ang ginkumpirmar ni Mrs. Sylvia Dela Cruz, Provincial Agriculturist sang ma-interview sang Bombo Radyo.
Partikular sa mga lugar nga nagpositbo ang meat samples amu ang duwa ka area sa Brgy. Natividad, Pilar, Brgy. Butacal, Panay, kag Brgy. Barra, Roxas City.
Suno kay Dela Cruz, mataas ang toxicity level sang mga ini kun sa diin naglapaw sa tolerable level sang toxicity nga 60 micrograms/100 grams.
Masobra sa 200 micrograms ang gikan sa Brgy. Butacal, 87.11 micrograms ang gikan sa Brgy. Barra, samtang pinakamataas kag naglab-ot sa 276.66 micrograms ang Brgy. Natividad.
Bangud diri, magapadayon ang local public advisory sang gobyerno probinsyal nga dumilian ang pagkaon, pag-harvest, pagbaligya, kag pag-transport sang mga panginhason sa bug-os nga probinsya agud malikawan ang malain nga epekto sini sa ikaayong lawas sang mga Capizeño.
Gintul-id ni Dela Cruz nga ila naintindihan nga dako ang mangin epekto sini sa shellfish industry gani irekomendar niya suno diri sa higher officials ang posible mabulig ilabi na sa mga shellfish vendors kag mangingisda.
Indi man sini masiguro kun tubtob san-o magapabilin ang red tide nga isa ka natural phenomenon, apang ginsiguro sini nga magapadyon ang ila monitoring sa mga kalalawran ba-se sa ila protocol kada bulan.
Sa pihak sini, bangud sa indi filter feeders ang isda, mahimo sa gihapon ini kaunon apang limpyuhan lang sang maayo, amu man ang lukon ukon pasayan kag pusit.
Liwat nga ginapaalinton ni Dela Cruz sa pumuluyo nga sundon sa gihapon ang abiso sang gobyerno probinsyal ilabi na nga nagguwa nga positibo sa red tide ang resulta sang meat samples.
