Maga- upod ang Archdiocese of Capiz sa “Prayer Vigil for World Peace” subong nga adlaw.
Ini nga aktibidad ang kabahin sang pagpanawagan sang Catholic Bishops’ Conference of the Philippines (CBCP) sa nagapadayon nga kinagamo kag tensyon sa nagkalain-lain nga bahin sang kalibutan, nga nagahilapit sa mga komunidad kag pamilya.
Sa interview sang Bombo Radyo kay Very Reverend Monsignor Rufino Reggie Pamposa, Vicar General sang Archdiocese of Capiz, iya ginpahayag nga daku ang papel sang pagpangamuyo sa pagdala sang paglaum kag kalinong sa tunga sang kinagamo kag sa padayon nga epekto sini sa ekonomiya, ilabi na sa presyo sang gatong kag basic commodities nga mabatyagan sang ordinaryo nga pamilya.
Suno kay Pamposa, ang nasambit nga prayer vigil indi lamang simbolo sang relihiyoso nga debosyon, kundi isa ka kolektibo nga pagpanawagan sang kalinong sa kalibutan.
Pahayag pa niya, ang mga kabataan ang dapat mangin aktibo man nga kabahin sa pagpanindugan sang kalinong paagi sa pag-upod sa simbahanon nga aktibidad kag sa pagpalapnag sang positibo nga mensahe sa komunidad.
Nahibaluan nga pagahiwaton ang“Prayer Vigil for World Peace”subong nga adlaw, sa Metropolitan Cathedral and Archdiocesan Shrine of the Immaculate Conception humalin 11:00am tubtob 12:00NN.
Nagpanawagan man ang natungdan sa publiko nga magtambong sa nasambit nga aktibidad kag ipakita ang pagpakig-unong sa tanan nga apektado sang kinagamo sa kalibutan, bilang tanda sang paghiliusa kag paglaum,sa tunga sang krisis.
