PONTEVEDRA, CAPIZ – Indi sa gihapon mabaton sang bana sang senior citizen nga ginluthang-patay sang isa ka anay Barangay Kagawad sa Sitio Mantawad, Barangay Malag-it, Pontevedra Capiz.
Sa exclusive interview sang Bombo Radyo kay Rodrigo Asong bana sang biktima, ginpahayag sini nga sang natabo ang insidente papauli na kun tani sa ila balay ang iya manak nga ginkilala kay Ryan sakay ang iya traysikol apang bangud ginapahayag nga nagakapatay ang gasolinador ginpuga niya sini sang makapila ka beses kag natam-an nga didto malapit sa puluy-an sang suspek.
Bangud sa natabo dako na lamang suno diri ang ila kakibot sang ginsunod ang iya manak sa ila puluy-an sang suspek kag nagasinggitan nga maguha kung maisog.
Gilayon naman nga naguha si Ryan agud kun tani komprontahon ang suspek apang lipod sa iya ihibalo nga may dala ang suspek nga armas luthang kag hinali lamang sini niya nga ginluthang apang aksidente nga na-igo ang biktima nga magasaway lamang kun tani.
Suno kay Tatay Rodrigo, sang mabatian sini niya nga may lupok sang armas gilayon siya nga naguha agud istekyar apang daw kaangay nga gintambakan ini siya sang langit matapos makit-an nga nagahigda na ang iya asawa kag may igo na sa dughan tuga sang pagpangluthang gamit ang ginapatihan caliber .48 nga armas luthang.
Gintinguhaan pa suno diri nila nga ginpadangat sa ospital ang iya asawa para kun tani sa pagbulong apang gindeklarar nga dead on arrival sang doktor.
Sa karun, ginapasiguro ni tatay Rodrigo nga mahatag sa iya asawa ang hustisya kag indi pagtugutan nga magadaog ang kaangay sini nga mga buluhaton kag agud indi na masulit pa.
Matandaan nga wala na sang kabuhi sang ginpadangat sa Bailan District Hospital ang biktima nga ginkilala kay Josefina Asong 68-anyos matapos mag-angkon sang patal nga pilas sa dughan tuga sang pangpangluthang sang suspek nga anay Barangay Kagawad sa ila lugar.
