ROXAS CITY – Ginkadismaya sang isa ka Misis ang pagdakup sang mga katapo sang Traffic Management Unit (TMU) kag sang pulis sa iya Mister bangud sa pagpamasahero.
Sa interview sang Bombo Radyo kay Lolita Brillo, asawa sang driver sang colorum nga si Agustin Brillo, residente sang banwa sang Panay, suno diri nga daw kaangay sa kriminal ang nangin pagtratar sang mga katapo sang TMU sa pagdakup sa iya bana.
Aminado man ini nga makaduha na ka beses nga nadakpan ang iya bana kag sa gihapon nagabiyahe, bangud pamasahero gid lamang ang nagabuhi sa ila pamilya.
Apang, kuntani, nangin patas ang TMU sa pagdakup sa mga colorum nga traysikol sa banwa sang Panay, kag indi pinilian.
Ginpahayag pa sini nga may yara sang prangkisa sa pagbiyahe ang iya bana apang sa palibot gid lang sang banwa sang Panay.
Gin-aku man sini nga ginadul-ong sang iya mister ang mga pasahero sini pasulod sa Roxas City, nga kuntani, suno sa ginang ginkonsiderar nalang sang TMU bangud mga residente man ini sang banwa sang Panay.
Sa karon, nagapangita ang mag-asawa sang inuggawad sang ila traysikol matapos nga liwat nga nadakpan sa ginpatigayon nga operasyon sang TMU.
